Si dice di a finzione ch’ella hè creazione di l’imaginazione, dunque in oppusizione à a realità oghjinca. Ma s’hè vistu chì pò accade ch’ella dipassi a realità. À tutti conti, pò dassi ch’ella permetti di riflette à ciò ch’ellu hè u veru è, moltu più, à ciò ch’ellu pò generà dumane.
L’autore chì, sin’à oghje, ci hà fattu spassighjà à traversu à i seculi scorsi, soga l’hè pigliatu l’estru d’andà à vede ciò ch’ellu prumette l’avvene. Ci porta in un paese immaginariu, Ostrisorma (trà mesu à Ostriconi è Filosorma). L’omi è i ritratti ch’ellu ne dà, u spaziu ch’ellu percorre, quellu di u 2075, vale à dì cent’anni dopu à l’evenimenti d’Aleria chì, cum’è ognunu sà, anu iniziatu una andatura nova à a nostra isula, facenu rispirà, sente, vede è tuccà un altru campà. Ancu s’è l’attavisimu resta intieru è chì tuttu muta versu, serà quessa a Corsica di dumane ?
