Nota di l’autore.
Una ghjornu, in cor d’una cunversazione cun l’amicu Ghjacumu Thiers, aghju ammintatu quelle cavalcate praticate à traversu tutta a Corsica, e stonde felice quant’è quelle più pessime. È tandu ch’ellu m’hà dettu : "Quessa ci vole à scive la". Hè cusì chì l’idea hè nata è ch’ellu hè surtitu u mo primu libru : "À cavallu" (Sammarcelli, 1999). A scelta s’hè fatta di dà primura à a forma cronica, per ciò chì tocca à u vissutu è dopu à i raconti, ogettu di finzione. S’hè accertata dunque, issa manera di sparte in dui queste Cavalcate. Essendu chì l’affare tene attempu di u resu contu, dettu dinù ghjurnale di viaghju è di a messa in sesta di stalvatoghji fittivi, ma chì sà…
Quandu era per isse culunie, mi ramentu chì a sera, passata l’ora di spustà, o essendu di permanenza, u mumentu m’era favurevule per riflette o medità, ùn serebbe chè per passà u tempu. Leghje benintesu, ma dinù a nustalgia di l’isula luntana mi mettia in brama di ritruvà la. È tandu, di nasu in una carta di statu magiore di a Corsica, sugnava à tutti issi chjassi, senteri, piste è viali chì d’una ligna culurita mi facianu viaghjà, passendu in imaginazione da Balagna à Niolu, da Castagniccia à Fium’Orbu è da Cruzzini à Alta Rocca. Mi ci vidia à cavallu. Cun dui cavalli. Unu di sella è l’altru d’imbastiu, traversendu pieve, scuprendu monti, piazzili è fureste, biendu à limpide surgente o durmendu in qualchì stazzu o pagliaghju, annannatu da l’alitu muntese è a delizia di u silenziu d’una notte stellata è serena.
Mi prumettia tandu, dopu d’avè cautatu in un scornu di mente issi sogni, di passà à l’attu una volta di ritornu in Cirnu.
Benintesu, strada facendu, per isse culunie, mi fù data l’occasione di cavalcà quì è quallà. Ma nisuna spassighjata esotica ùn pudia suddisfà mi quant’è quelle chì m’aspettavanu in li nostri lochi.
Hè cusì chì, a prima di e cose, rientratu in Corsica in lu ‘68, finitu l’avanti ultimu segiornu culuniale, aghju fattu l’incetta d’un cavallu. È cusì messa in sesta a mo prima cavalcata di trè ghjorni. Dilettu di partenza è malinconicu d’arrestu, ma vulinteri sempre.
Parlà di viaghju à cavallu in l’annate ‘70 paria una pazzia. Invece ch’ella era più asgiata di fà strada in una bella vittura nova. Parte à cavallu paria un pocu, à un cerbellu assensatu, una idea strana. Mi sò ancu intesu dì : "Strazià per issi monti cù una fera quandu s’hà cusì bella vittura !" Ùn aghju po mancatu di sente i cumenti, m’anu ancu pigliatu per qualchì originale.
Quandu si sà chì scopre ghjornu à ghjornu spazii novi hè un piacè, una curiusità suddisfatta, ùn s’abbadanu i discorsu ironichi o disprezzosi. Tandu, si face da sè.
Eccu, in somma, a ragiò di queste croniche, a scusa di scrive è di mantene in memoria tante "usanze è modi di fà", cum'ellu a scrivia Montaigne, ellu chì hè andatu sempre "à salti è sgambittate" da u so castellu perigurdinu, hà traversatu Francia è Svizzera sin’à Roma, è hè riturnatu in casa dopu à dicesette mesi di viaghju à cavallu. L’autore di "Les essais" avia u penseru di ùn smenticà l'omu è e so facezie, quelle di l'altri ma dinù e soie stesse. Mi vense dunque l’idea di rifà u listessu viaghju in Italia. Cascava à piccu, venia di piglià a ritirata di l’armata è era ora di passà à l’attu, quattru seculi dopu à quellu di Montaigne in 1580. Ma era tandu impegnatu dapoi trè anni à fà a prumuzione di u turisimu à cavallu di a Corsica è m’hè parsa più astuta è utile di mette in sesta un giru di Corsica à cavallu chè quellu di parte per issu cuntinente à prumove l’altrò. Cunsiderendu ch’ella serebbe di meglior prufittu per a Corsica. È cusì feci.
Insellemu dunque, amintemu cavallina è qualch'ella sia a difficultà di parlà di sè, essendu datu ch'ella ci serà dinù, per furtuna, a pussibbilita d'ammintà à l'altru, à tanti altri.
È po, quand’omu hà tuccatu à a novantina, si pò tirà u bilanciu di u vissutu… è dissi ch’ella hè venuta l’ora di sparte lu. È di scrive la.
Guidu Benigni,
Campu Vallinu,
Ghjennaghju 2022.
